ازفت بركوب عالي الشوق و جيتك
ملّيت هـ الصمت و أتعبني سكاتي
أهديت لك قلبي و شيّدت به بيتـــك
عشقت دنياي من سمّيتك حياتي
توهبني دافي شعورك لامن دعيتك
و أفيض لك إحساس بروحي و ذاتي
صبيت حبّك في فنجالي و تقهويتك
و أخذت من عسل ريقك حالي أبياتي
تدري حبيبي إن مرّ يوم ومالقيتك
أعزم طيوفك للسهر و ابدا معاناتي
حظي ابتسم لي بس لحظة هويتك
انكتب في كفّ القدر" أسمى غاياتي"
أصحى لك و أنام بك ولا مرة سليتك
يفداك ما راح من العمر و الآتي
ألبس جناح الوجد و أجي حزّة مبيتك
أداعب أحلامك و تشاركني خيالاتي
بـ اسمك نطق شوقي كل ما طريتك
"مجنون في حبك" هي أحلى صفاتي
هوجاس فقدك .. ذابحني فديــتـك
لا تطري الفرقا ثم أعلن وفاتي
هي كلمتين أبيك تذكرها رجيتك
إن مت تلقى غلآك معجون بِـ رُفاتي
هذا الجواب و القرار مثلك بغيتك
و ما خلق من قدر يغير قناعاتي
السبت مايو 12, 2018 1:42 pm من طرف 
